Wala naapil si Filipino Kevin Quiambao sa lineup sa Sacramento Kings alang sa National Basketball Association (NBA) 2K26 Summer League nga ipahigayon karong Hulyo 10-20, 2025 sa Las Vegas, USA.
Ang 6’6” nga produkto sa De La Salle University (DLSU) Green Archers kasamtangang naa sa Sacramento, USA ug niapil sa training camp sa Kings sa pamasin nga makaduwa siya sa NBA Summer League.
Apan wala niresulta ang pamasin ni Quiambao, kinsa nangandoy nga mahimong labing unang lumad nga Pinoy nga makaduwa sa NBA.
Niini, gilaumang mobalik si Quiambao sa Korean Basketball League (KBL) diin usa siya sa mga sinaligan sa Goyang Sono Skygunners.
Sa KBL, si Quiambao nag-average og 16.9 puntos, 6.3 rebounds, 3.9 assists, ug 1.3 steals sulod sa 23 ka mga duwa sa iyang rookie season.
Gilauman sab nga magtutok si Quiambao sa iyang pagduwa sa Gilas Pilipinas alang sa 2025 FIBA Asia Cup nga ipahigayon sa sunod buwan sa Jeddah, Saudi Arabia. / ESL