NADISKUBRIHAN ni Cebu Governor Pamela Baricuatro ang kakuwang sa suga, medisina, ug ekipo sa Ramon Maningo Memorial Hospital atol sa iyang pagbisita sa Isla sa Camotes niadtong Biyernes, Agusto 8, 2025.
Sa iyang pagbisita nagpauban siya og mga sakop sa Provincial Engineering Office (PEO) aron madali ang pag-ayo sa mga pasilidad.
Matod ni Baricuatro, ang Camotes maoy unang gipahigayonan sa ilang Caravan of Services tungod kay layo kini sa mainland ug dako og panginahanglan sa tabang gikan sa Kapitolyo.
Gawas sa ospital, gibisita usab sa gobernadora ang Esperanza Elementary School sa Lungsod sa Poro ug nakita niya ang dili maayong kahimtang sa mga classrooms.
Usa ka magtutudlo si Raymond Roluna nitug-an nga kanunay mahunong ang ilang klase kung ting-uwan tungod kay motulo ang atop ug mabasa ang ilang mga gamit.
Guba usab ang canteen sa tunghaan.
Nakighugoy-hugoy usab si Baricuatro sa mga tinun-an ug magtutudlo sa Luciano B. Rama Memorial High School ug nanawagan sa mga estudyante nga likayan ang bisyo.
Gihulagway sa gobernador nga malampuson ang maong caravan nga nakaserbisyo sa gatusan ka mga residente. Naglaum usab si Dr. Nikki Catalan, health consultant sa Kapitolyo, nga masusi ang school clinic aron masiguro ang kaayohan sa mga estudyante. / ANV