NAGKAUYON ang Kagamhanan sa Probinsiya sa Sugbo ug ang public toilet service provider nga Mister Loo nga mohatag og libreng paggamit sa toilets sulod sa duha ka bulan sa Cebu North Bus Terminal (CNBT) ug Cebu South Bus Terminal (CSBT), sugod karong Biyernes, Agusto 1, 2025.
Kini ang gipahibalo ni Cebu Gov. Pamela Baricuatro atol sa press conference niadtong Miyerkules, Hulyo 30.
“Naabot namo ang kasabutan sa Mister Loo nga ang ilang mga kasilyas libreng magamit sulod sa duha ka bulan samtang giayo namo ang mga public toilet sa North ug South Bus Terminals,” matod ni Baricuatro.
Apan giklaro ni Mister Loo Country Head Eric Camposagrado sa usa ka eksklusibong interbyu sa SunStar Cebu sa Miyerkules, Hulyo 30, 2025, nga ang ihatag nga libre usa lang ka toilet matag usa sa CNBT ug CSBT.
Sumala sa gobernadora nga usa ka bag-ong kontrata sa Mister Loo ang gisusi pa, partikular na ang mga termino ug kondisyon niini.
Kini nga kasabutan nagsu-nod sa proposal ni Baricuatro niadtong Huwebes, Hulyo 24, alang sa tulo ka bulan nga libreng paggamit sa mga pasilidad sa Mister Loo.
Nagpakigkita ang mga personahe sa Mister Loo kang Baricuatro niadtong Biyernes, Hulyo 25, 2025.
Apan duha lang ka bulan ang gihatag sa Mister Loo.
Giklaro ni Camposagrado nga usa ka site matag usa sa CNBT ug CSBT ang libreng magamit gikan sa Agusto 1 hangtod Septiyembre 2025.
Ang Mister Loo adunay tulo ka kasilyas sa CSBT nga nag-operate sulod sa 12 ka oras, samtang ang Kagamhanan sa Probinsiya adunay duha.
Sa CNBT, ang Mister Loo nag-operate sulod sa 24 ka oras.
Ang mga toilet sa duha ka terminal adunay libreng manpower, repairs, ug maintenance sulod sa duha ka bulan.
Naghatag ang Mister Loo og duha ka klase nga kasilyas: deluxe, usa ka semi-automatic toilet nga adunay tissue paper ug sabon, ug ang premium, usa ka fully automatic toilet. / CDF