Gibutyag sa Kalihim sa Department of the Interior and Local Government (DILG) Jonvic Remulla nga nakig-alayon na sila sa International Criminal Court (ICC) aron si kanhi Presidente Rodrigo Duterte makapanumpa sa iyang katungdanan isip bag-ong napiling mayor sa Davao City samtang anaa sa detention sa The Hague, Netherlands.
Sa usa ka interbyu sa mga tigbalita, gibutyag ni Remulla nga gitahod sa DILG ang kadaugan ni Duterte kinsa gideklarar nga mayor-elect sa Davao City sa bag-ohay lang natapos nga May 12 election.
Matod ni Remulla, nananghid ang DILG ngadto sa ICC aron tugotan ang ambassador of the Philippines to the Netherlands sa pagdumala sa panumpa ni Duterte sulod sa detention facility sa ICC aron siya makalingkod sa katungdanan.
“We recognize the victory of former President (Duterte). Siya ang dineclare ng Comelec na mayor. Na-proclaim siya a day after elections. Overwhelming mandate. We recognize him as the mayor,” matod pa ni Remulla.
“Ang gagawin ko na lang ay magpapaalam ako sa ICC kung pwede pumunta ang consul natin para makapag-oath siya. Kailangan mag-oath siya to assume office,” dugang pa niya.
Hinuon, matod ni Remulla nga tungod sa absence ni Duterte, ang iyang anak nga si Sebastian kinsa giproklamar nga vice mayor-elect sa siyudad maoy kasamtangan nga magsilbi nga acting mayor.
“In his absence, the vice mayor will be there. Number one concern natin, makapag-oath siya as mayor,” pasabot ni Remulla.
“Hindi (pwede work from Hague). Kailangan physically present ka. In his capacity na hindi niya kaya magsilbi, ang vice mayor muna ang uupo,” sigun ni Remulla.
Niadtong Marso 11, gisikop si Duterte pinasikad sa warrant of arrest nga giisyu batok kaniya sa ICC taliwala sa nagpadayon nga imbestigasyon niini sa giingong crimes against humanity sa nasod atol sa pagpatuman sa iyang drug war gikan 2011 hangtod 2019, sa dihang siya pay mayor sa Davao City ug sa dihang presidente sa nasod.
Si Duterte gidala gilayon paingon sa Netherlands pinaagi sa pribadong jet alang sa iyang pagtugyan ngadto sa ICC. / TPM / SunStar Philippines