Nabalhog sa Mabolo Police Station ang usa ka 27-anyos nga lalaki human niya dagmali ang iyang kaipon alas 2:30 sa kaadlawon, Huwebes, Agusto 7, 2025, sa ilang panimalay sa Sitio Rio 2, Barangay Lahug sa Dakbayan sa Sugbo.
Ang nadakpan giila nga si alyas Jerico, lumad nga taga Carreta apan kasamtangan nga nagpuyo sa maong lugar samtang ang iyang gisumbag ang ulo ug nawong mao ang kaipon nga si alyas Grace, 30.
Sa imbestigasyon sa Mabolo Police Station nga nagpatabang kanila ang biktima nga si Grace bitbit ang iyang anak kay gikulata sa iyang kaipon pinaagi sa pagsumbag sa iyang ulo ug nawong sa walay igong hinungdan.
Tungod niini, gipatawag ang iyang kaipon sa barangay uban sa mga barangay tanod nga maoy nag-pick up niini sa balay aron sila mahusay ug magkauli ang ilang maayong kabubot-on.
Apan sa dihang nag-abot sila sa barangay, gitawag niya ang iyang 2-anyos nga anak lalaki ug dayong gakos ug dili na niya kini ihatag sa iyang kaipon.
Sa dihang kuhaon na unta kini sa inahan, gipaak na hinuon sa suspek ang dughan ug sampot sa bata nga maoy hinungdan nga gipusasan kini sa mga polis ug gidala sa police station.
Hugot nga gihimakak ni alyas Jerico nga iyang gidagmalan ang iyang anak ug ang iyang kaipon.
Matod niya alas 11 sa gabii sa Miyerkules, Agusto 6, 2025, gipukaw siya sa iyang kaipon ug giyawyawan tungod sa pagduda nga duna siyay relasyon sa igsuon niining babaye.
Gibadlong niya kini nga dili na magsigeg yawyaw kay maulaw sa ilang mga silingan nga makabati apan wala mopatuo.
Gihimakak sab niya nga iyang gipaak ang dughan sa iyang anak ug tumo-tumo lang kini sa iyang kaipon.
Giangkon hinuon sa suspek nga nabilanggo na siya sa Cebu City Jail tungod sa kaso sa ilegal nga drugas ug wala na magbisyo sa dihang nakagawas.
Kasong physical abuse in relation sa Republic Act 9262 ang ipasaka sa Mabolo Police Station batok sa suspek. / AYB