Amahan gipadakop kay nanumbag sa iyang menor de edad nga anak babaye alas 6:37 sa gabii, Lunes, April 14, 2025, sa Sitio Kalumbuyan, Barangay Buhisan, Dakbayan sa Sugbo.
Si Mai-Mai, 13, nakaangkon og bun-og sa iyang bukobuko.
Si Mai-Mai, uban sa iyang maguwang nga si Len-Len, 23, ni-report sa Labangon Police Station 10 sa Cebu City Police Office (CCPO). Si Tonio, 50, (amahan, suspek) gitanggong sa Labangon Police Station nga mag-atubang sa kasong physical injury in relation to RA-7610 (Child Abuse).
Si Police Major Timothy Jim Romanillos, Hepe sa Labangon Police Station niingon nga nawala ang selpon sa amahan hinungdan nga nasuko ug nagtuo nga gihilabtan sa anak.
Sa kalagot sa suspek gisumbag ang bukobuko sa bata. Gumikan niini nangayo sila'g panabang sa mga tanod ug kapulisan.
Matod ni Romanillos nga nangayog pasaylo ang amahan apan ang anak nipadayon gyud sa kaso batok sa kaniya. / GPL