Namatay diha-diha ang usa ka manghimoay og chicharon human kini gidunggab sa iyang ig-agaw nga giingon’g adik sa alas 9 sa gabii sa Huwebes, Abril 24, 2025, sa Barangay Valladolid, Dakbayan sa Carcar.
Ang biktima giila nga si Gilbert Baran Lawas, 40, minyo, nagpuyo sa nahisgutan’g lugar.
Nakaangkon siya og kapin 10 ka samad dinunggaban sa kalawasan nga maoy hinungdan sa iyang hinanaling kamatayon.
Ang mga suspek nadakpan atol sa gihimong follow-up operation sa kapulisan.
Si Rodulfo Lawas Jr., 41, ulitawo, giingong adik-adik nga ig-agaw sa biktima, nadakpan pagka-Huwebes sa gabii, samtang ang iyang kauban nga si Allan Campaña, 50, nadakpan sa Biyernes sa kaadlawon.
Matud sa ilang silingan nga si Henry Salazar, 29, ang biktima ug mga suspek nagtagay og nag-videoke uban sa mga kabanay ug mga higala sa wala pa ang hitabo kay birthday sa anak ni Gilbert.
Samtang nagkanta ang biktima, giingon’g nibarog og kalit si Rodulfo ug giingnan kini nga ‘boang ka’ ug dayon gidunggab sa makadaghan’g higayon gamit ang kitchen knife.
Si Police Staff Sergeant Argie Noel Espinosa, imbestigador sa Carcar Police Station nga nahinabi sa Superbalita Cebu, miingon nga karaang bangi sa bisyo sa biktima ug mga suspek ang motibo sa krimen.
Tungod sa kahubog, nagkalalis sila pagbalik.
Matud ni Espinosa nga gitabangan sa mga suspek ang biktima.
Si Campaña maoy nagkupot, samtàng si Rodulfo, maoy nagdunggab sa makadaghan’g higayon.
“Makadaghang higayon sir pwerting daghana sa samad! Akong tan-aw ato kapin sa napulo ang samad. Ato pa hinuon nga gipaabot ang resulta sa autopsy,” matud ni Espinosa.
Ang mga saksi mibutyag nga atol sa pagdunggab nakadagan pa ang biktima.
Mosulod unta kini sa ilang panimalay apan gigukod sa duha ka suspek og sa dihang natumba gitiwasan kini sa pagdunggab ni Rodulfo.
Human sa pagdunggab dali nga nanibat ang mga suspek.
Pero positibo silang giila sa mga silingan nga saksi hinungdan nga nadakpan.
Si alyas Kim, asawa sa biktima, mibutyag nga ang iyang bana uban sa suspek alas 3 pa sa hapon sa Huwebes nagsugod og tagay gawas sa ilang panimalay.
Gikompirmar nila nga ang suspek tiggamitan sa illegal nga drugas.
Gani sa miaging mga adlaw, magyawyaw matud pa kini nga mag-inusara nga duna daw tawo nga magsunod-sunod kaniya. / GPL