Amahan namusil sa kapulisan human nasuko nga “gi-rescue” ang iyang menor de edad nga anak lalaki tungod sa pagbitbit og ice pick.
Kini nahitabo sa Sitio Sawsawan, Barangay San Roque, siyudad sa Talisay, alas 4:30 sa kaadlawon sa Huwebes, Marso 14, 2022.
Hinuon, way naigo nga polis apan naangol ang suspek human basli sa mga otoridad.
Ang suspek giila nga si Noly Boy Topic, alyas Dongard, hamtong, taga Purok Bangus, San Roque, City of Talisay.
Sa pakisusi sa Superbalita Cebu, nasayran nga ang Talisay City Police Station ubos sa kamanduan ni Police Lt. Col. Wayne Magbanua, nipahigayon sa ilang anti-illegal gambling operations sa dapit.
Naaghat kini nga operasyon tungod sa daghang sumbong nga nadawat nga grabi ang kalihukan sa sugal sa dapit.
Atol sa operasyon, usa ka lalaking menor de edad nasakpan sa akto nga nagdala og ice pick, sagad gamiton sa paghimo og krimen.
Sa dihang gipangutana ang menor kon nganong wa pa natulog nga kaadlawon na ug nagdala-dala pa og hinagiban, kalit nga niabot ang amahan.
Sa way lipudlipod, sumala sa kapulisan, kalit nga namusil hinungdan nga gibawsan sa pagpusil ug naigo sa wa’ng tiil.
Ang amahan gidala sa Talisay City District Hospital apan ang anak niini nga menor de edad nakaeskapo atol sa kaguliyang. / DVG