Paril sa usa ka compound nalumpag sa dihang wa na madaug niini ang gibug-aton sa gipundo nga sand and gravel, 4:19 sa hapon, Biyernes, Hulyo 19, 2024 sa Sityo Kawot, Barangay Bankal, Lapu-Lapu City.
Gibutyag sa hepe sa Lapu-Lapu City Disaster Risk Reduction Management, Nagiel Bañacia, nga ang nalumpag nga paril miguba sa mga balay nga nahimutang sa gawas.
“Taas na ang volume sa stock pile sa sand and gravel ug wa na kadaug ang paril mao to. Unya naay mga balay gawas sa paril ang nalumpagan,” asoy ni Bañacia sa dihang nahinabi sa Superbalita Cebu.
Ang paril adunay 10 ka tiil ang gitas-on samtang sa gawas nga bahin adunay kabalayan.
Usa ka balay ang totally damaged samtang pito ang nakaangkon og minor nga guba.
Samtang usa ka 63 anyos nga babaye natabunan apan dali ra sab nga natabang sa mga silingan ug giatiman gilayon sa rescue team. Siya nakaangkon og mga bun-og sa tuhod ug tiil.
Luwas na siya sa makuyaw nga kahimtang.
Atol niining pagsuwat ang mga barangay official pinaagi nila ni Bankal councilors William Paquibot, ug Tomas Borromeo nimando sa pagkandos sa mga pinundo nga bas gamit ang backhoe aron dili makamugna og pressure o gibug-aton sa ubang bahin sa paril.
Gisusi pa kon si kinsa ang nanag-iya sa maong compound o kadtong nag-negosyo sa maong construction aggregate.
Bugtong nasayran nga ang tag-iya niini giingong taga-Manila.
Ang mga pamilya nga nangaapektuhan kasamtangan nga gipabakwit sa mas luwas nga lugar.
Ang kagamhanan sa Lapu-Lapu pinaagi sa buhatan ni Bañacia ug City Social Welfare Office niapod-apod og food packs sa mga nabiktima. / FVQ