Usa ka parking attendant nga katulo na nabilanggo sa kasong pagpangawat gipusil-patay sa wa mailhing killer sa dan Katipunan, Barangay Labangon, Siyudad sa Sugbo, pasado alas 9 sa gabii sa Miyerkules, Oktubre 18, 2023.
Base sa kasayuran nga nakuha sa Superbalita Cebu gikan sa kapulisan sa Labangon Police Station, nga gipangulohan sa ilang station chief nga si Police Maj. Angelito Valleser, ang biktima giila nga si Niño Dignos Dacupa, 30, ulitawo, taga Sityo Callejon , Labangon.
Samtang nagbantay sa mga sakyanan sa dapit, siya giduol sa wa mailhing armadong lalaki ug gipusil tumong sa ulo.
Sa pakisusi sa kapulisan, nasuta nga napriso na si Dacupa sa tulo ka higayon sa kasong pagpangawat.
Wa pa masuta unsay motibo sa pagpatay.