Bisan ning panahon nga grabe ang kainit tungod sa El Niño phenomenon, apan ang lapok ug dunay lim-aw sa tubig sa Pasil Fish Port ug Market sa Barangay Pasil, dakbayan sa Sugbo.
Pipila ka fish dealers nga nahinabi sa Superbalita Cebu sa Dominggo, Abril 14, 2024, nagkanayon nga baho ang palibot ug walay pansayan sa Fish Port.
Nipadayag sila sa ilang kasagmuyo sa nagdumala sa merkado human gireklamo na nila kini sa kagamhanan sa dakbayan sa Sugbo.
Matod pa, ang moabot na sa tuig ang maong problema sa kahugaw sa dapit nga nag-unang tumuranan o bagsakan sa mga isda sa dakbayan.
Si Jonnabel Torrion, usa sa mga trabahante sa fish port, nibutyag sa hapit na moabot sa usa ka tuig nga walay pansayan ug walay igong tubig hinungdan sa kabaho sa palibot.
“Kanang mga babaye, Sir, diretso ra diri sa sawog mangihi. Unya ang mga lalaki adto didto sa daplin sa dagat pasirit sa ihi,” matod ni Torrion.
Usa sa mga mangkarga'g isda mibutyag sa Superbalita Cebu nga lisod kaayo para sa ilang habig kay moadto pa sila og balay-balay aron makapagawas sa ilang hugaw.
Matod pa, dunay paabangang pansayan nga tag P10 o P20.
Hapit tuig ilang pag-antos kay wala tagda ilang pansayan sa Pasil Fish port ug wala pa gyoy tubig, dason sa ilang reklamo.
Usa ka Jayson Bayupan, nagtrabaho sa isdaan sa Pasil Market uban sa mga kauban nagreklamo sab sa kabaho ug sa tubig nga naglanaw. Igo lang moagi ang taga City Hall motan-aw apan giingong walay aksyon.
Nanghinaot sila mga mahatagag og solusyon ilang problema. / GPL