Nasikop sa kapulisan ang usa ka pastor sa simbahan sa Baptist ug kauban niini niadtong Lunes, Oktubre 16, 2023, sa Barangay Lapasan, dakbayan sa Cagayan de Oro human sila giakusahan sa pagpatay sa kandidato sa Mister Cagayan de Oro nga si Adriane Rovic Fornillos niadtong Mayo 9, 2023.
Ang warrant of arrest sa kasong murder nga giisyu ni Judge Marites Filomena Rana Bernales sa Cagayan de Oro City Regional Trial Court Branch 39 gisilbi ngadto kang Dimver Andales, senior pastor sa usa ka Baptist church nga nagbase sa Barangay Lapasan.
Nasikop usab niadtong Lunes si Juther Nonot, kaubang pastor ni Andales.
Si Police Captain Byron John Ratunil, police station commander sa Barangay Nazareth, niingon nga laing duha ka mga tawo ang nalambigit sa pagpatay kang Fornillos.
Ang 24-anyos nga tinun-an sa kolehiyo nga si Fornillos, residente sa Barangay Lapasan, gipusil sa wala mailhing tawo sa 13th St. sa Barangay Nazareth, dakbayan sa Cagayan de Oro.
Siya gideklarar nga patay mga alas 12:30 sa udto niadtong Mayo 10 tungod sa grabeng samad sa ulo gumikan sa pagpusil.
Mga bulan human sa pagpatay, ang ngalan ni Andales nigawas sa social media, uban sa mga post nga nag-akusar kaniya nga adunay relasyon sa uyab ni Fornillos ug nagduda nga siya ang utok sa pagpatay.
Si Andales mihimakak sa mga pasangil, kay nakaila siya sa uyab sa biktima tungod sa common friends.