NAKABSAN sa kinabuhi ang usa ka 42-anyos nga lalaki human gituohang gipusil sulod sa usa ka balay apan giingong gibalhin ang patay nga lawas sa gawas nga bahin ug gilimpyuhan ang mga dugo sa mismong mga barkada sa Sitio Lupa 1, Barangay Pajac, Dakba-yan sa Lapu-Lapu niadtong Hulyo 1, 2025.
Ang biktima giila lang sa alyas nga Dodong, residente sa maong barangay.
Base sa imbestigasyon sa Lapu-Lapu Police, gipahibalo sila nga adunay napalgan nga patay nga lawas sa na-asoy nga dapit ug sa pagsusi, usa ka lalaki ang wala nay kinabuhi pila na ka oras ang nilabay ug nakapaduda nga dili na mao ang orihinal nga position sa lawas.
Tungod kay adunay mga ebidensya nga giguyod ug gibalhin sa gawas nga bahin sa balay ug gitrapohan ang mga nagpasad nga dugo diin kini gipusil.
Sa dugang pakisusi sa kapulisan, usa ka saksi ang nibutyag kanila nga ang maong insidente nahitabo sud sa balay ni alyas “Junjun” usa ka street sweeper ug barkada sa biktima nga gituohang nag-pot session uban ang biktima ug laing higala nga si alyas Goryo.
Nidugang ang saksi nga mga ala 1:00 pasado sa hapon, Hulyo 1, duna siyay nadungog nga duha ka buto sa armas. Dangtan og usa ka oras sa dihang nigawas ang maong witness sa iyang balay, iyang nakit-an si “Junjun” ug “Goryo” nga giyayungan ang biktima padulong sa gawas nga bahin ug dayon nanglakaw.
Nipahigayon og hot pursuit operation ang kapulisan ug malampusong nadakpan sila si “Junjun” ug “Goryo”.
Apan sa pakighinabi sa mga suspek, nangatarungan sila nga ilang gibalhin ang biktima sa gawas kay dad-on unta nila sa hospital kay buhi pa niadtong higayona.
Nibutyag ang mga suspek nga dili sila ang gahimo sa pagpamusil ug dunay usa ka lalaki nga kalit lang niadto sa dapit ug nagkalalis sa biktima tungod lang sa sigarilyo hinungdan nga gipusil kini.
Padayon pang gipangita sa kapulisan ang usa sa mga gitumbok nga maoy nipusil sa biktima nga nisibat human sa pagpamusil samtang ang duha ka mga higala sa biktima gitanggong sa Lapu-Lapu City Police Office lock-up facility. / JDG