Nailhan na ang lalaking gipatay ug gisu'd sa sako nga gihulog sa pangpang sa Sityo Ilong Ilong, Brgy. Santicon, bukirang dapit sa lungsod sa Badian, Cebu nga nakit-an sa 17 anyos nga nangahoy sa dapit, alas 7:00 sa buntag, Mayo 7, 2024.
Sigun pa ni P/Capt. Jerwin Mark C Battung, hepe sa Badian Municipal Police Station, nga ang biktima giila sa kabanay sa Miyerkules, Mayo 8 sa buntag, nga niadto sa Sacred Heart Funeral Homes sa Brgy. Palanas, lungsod sa Ronda.
Kini mao si Vanesh Joseph Oralde, 21, taga Brgy. Bunga, siyudad sa Toledo,pag-umangkon sa barangay kapitan sa Bunga.
Matod ni Battung nga asoy sa ginikanan sa biktima nga siya missing sukad niadtong Dominggo sa hapon, Mayo 5, 2024.
Ang iyang lawas nadiskubrehan nga gisu’d og sako ug gihulog sa pangpang sa naasoy’ng dapit.
Si Battung nagkanayon nga nagpadayon pa ang ilang imbestigasyon aron masayran kon unsay background sa biktima, unsay motibo sa pagpatay, ug kinsa ang mamumuno.
Matod niya nga nagpaabot pa siya sa resulta sa autopsy aron mahibaw-an og giunsa pagpatay ang biktima. / DVG