Nagtikangkang ug wala nay panty ang patayng lawas sa 22 anyos dihang gihiling sa pamilya sa lungon nga nadiskubrihan nga gikuha gikan sa nitso, alas 7 sa buntag, niadtong Oktubre 20, 2024, sulod sa Ocaña Public Cemetery sa Barangay Ocaña, Dakbayan sa Carcar.
Mao kini ang gibutyag ni Artemio Laputan, sepulturero kinsa maoy nipahibalo sa simbahan, kabanay ug sa kapulisan bahin sa paggawas sa lungon.
Si Laputan, nga nahinabi sa GMA DYSS Super Radyo Cebu, niingon nga nakuratan siya alas 7:09 sa buntag niadtong Dominggo sa iyang pag-abot sa sementeryo ug pag-agi niya duol sa usa ka nitso, maoy nisugat niya ang lungon sa biktima.
"Naratol ko. Nakuyawan. Akong giingnan (ang patay) nga uy nganong nanaog man ka sa ubos," dugang ni Laputan.
Gipahibalo niya ang pari, kinsa mipadayag nga i-report sa polis.
Gipahibalo sab niya ang kabanay diin gipakita ang picture dayong gipa-blotter niya ngadto sa kapulisan.
Sumala ni Laputan, ng sa pag-abli sa pamilya sa lungon, ang patay nakita nga wala nay panty, nakita ang dughan ug nagtikangkang, unya nabali pagbutang sa lungon.
GIDUDAHAN
Samtang si Clinton Lato, helper sa sepulturero, hugot nga nihimakak nga gidudahang may kalambigitan sa hitabo atol sa pakighinabi sa GMA dySS Super Radyo Cebu.
Gipadayag niini nga andam siya sa pag-atubang kung ipatawag sa kapulisan.
Gibutyag niini nga buntag na siya gipahibalo sa iyang kaila nga drayber diha sa Cebu South Bus Terminal.
Giingnan siya nga maoy gipasanginlang milugos sa patay sa sementeryo.
"Naglagot ko akoy gipasanginlan bati kaayo nang pasangil niini," matod ni Lato, kinsa nagkanayon nga wala siyay kontra.
Si Police Lt. Col. Bryan O'Neil Salvacion, hepe sa Carcar City Police Station, nibutyag nga sa pagkakaron, dili pa sila makahukom kon 'nahilabtan' ang patay sanglit nagpaabot sila sa report sa Scene of the Crime Operation (Soco), kinsa maoy naghimo sa swabbing o pagkuha og specimen aron tun-an.
Ang kapulisan nagkanayon nga duna na silay person of interest nga gisubay sa nagpadayon nga imbestigasyon.
HUSTISYA
Hustisya ang gisinggit karon sa pamilya sa patay nga giugkat sa iyang lubnganan human ilang gituohang giamungamongan kini.
Niadtong Sabado, Oktubre 19, 2024, gilubong si alyas Angel human manganak niadtong Septembre 11, 2024 apan nakabsan sa kinabuhi sa pagka Oktubre 9, 2024.
Matod sa igsuon ni Angel nga si Alyas John-John nga nahinabi sa dyHP nga ang finding sa doktor sa Vicente Sotto Memorial Medical Center nga ang namatyan niini mao ang eclampsia mugna sa iyang pagpanganak.
"Kanang mao nana ang iyang porma didto nga naa na sa yuta, pero pag-ukab sa lungon sa bildo hugaw kaayo ang kalawasan nya daghan kaayog buling sa iyang ulo nga mga minasa nga semento unya kanang gihuboan siya," matod ni alyas John-John.
Tungod niini, nagtuo sila nga gilugos ang patayng lawas sa iyang manghod gumikan kay hubo na man kini.
Ang amahan ni Angel nga si alyas Benjie niawhag sa kapulisan nga mahatagan gyud og hustisya ang gidangatan sa iyang anak.
Si Laputan, maoy naglubong sa patayng lawas ni Angel, nagkanayon nga ang iyang gamit sama sa bara ang gigamit usab sa mga malapason sa pag-ugkat sa patay.
Matod niya nga sa 30 ka tuig niya nga sepulturero sa maong sam-ang karon pa nga dunay nahitabo nga may lubong nga giugkat ug gituohang gilugos.
Nagtuo si Laputan nga subra sa duha ka tawo ang naghabwa sa patayng lawas sa biktima tungod sa kabug-at niini.
Nagduda siya nga ang naghimo sa maong krimen mao kadtong nasayod asa gibutang ang iyang mga gamit sa pagpanday sa nitso sama sa pala, bara de kabra, palita ug uban pa.Apan iyang giklaro nga dili siya makatumbok kung kinsa ang naghimo sanglit wala man siya makakita.
"Ang masulti ra gyud nako ana nga katong helper nako mao ray akung masulti nga naa sila diha nianang higayona duha sila kabuok," matod ni Artemio.
Ang usa sa mga helper nga gidudahan nga si Clinton hugot nga mihimakak nga apil siya sa pag-ugkat sa lubong.
Iyang gibutyag nga human gilubong si Angel, sa pagka pasado alas 9 sa gabii, nilarga siya padung sa dakbayan sa Sugbo aron mag-dispatcher sa mga bus atbang sa South Bus Teminal.
Nakurat na lang siya pagka Dominggo nga dunay balita nga dunay patay ang giugkat sa lubong niini sa Katolikong Sam-ang sa Ocaña.
Giangkon niya nga siya ang helper ni Artemio kung dunay ilubong sa maong sam-ang apan dili niya mahimo ang pag panamastamas sa usa ka patay.
"Pagka gabii gisultian ko sa driver sa bus nga naay lubong nga giugkat sa Ocaña, pero wala koy labot ana kay naa man ko sa South Bus ana," matod ni Clinton.
Awhag sa hepe sa kapulisan sa mga tawo nga dili lang una nga mohukom nga gilugos ang patay sanglit wala paman mogawas ang resulta sa pakisusi sa crime laboratory.
Kung mamatud-an nga gihilabtan ang patayng lawas ni Angel ug ang nahimo ilang matumbok pinaagi sa mga ebidensya mag-atubang kinig kaso nga necrophilia nga dunay hamtang nga silot nga tibuok kinabuhi nga pagkabilanggo. / DVG / GPL / AYB