Nakurat ang mga manginginhas dihang nakakita og patay nga tawo nga nasablay sa pagatpatan sa Sityo Tikoy, Barangay Bogo, lungsod sa Argao, alas 3 sa hapon, Huwebes, Hunyo 6, 2024.
Sa interview sa Superbalita Cebu kang Bogo Argao Brgy. Konsehal Edgar Lovitos Famat, nasayran nga ang namatay mao si “Albert’, hamtong, dunay deperensya sa pangutok ug lumolupyo sa dapit.
Matod ni Famat, si Albert giligo sa iyang anak sa dagat alas 7 sa buntag kay nagkahugaw kini ug gibiyaan nga nagkalingaw og sawom-sawom sa dagat kay ang anak manglimpyo pa sa ilang balay.
Apan sa dihang gibalikan sa anak sa dagat, na-missing na si Albert ug gipangita apan wa na makit-i.
Hangtod nga paghunas sa hapon sa samang adlaw, ang nagpadulong nga mga manginhas nakakaplag kang Albert nga patay na nga nasablay sa pagatpatan ug gituohan nga nalumos. / DVG