Usa ka 25 anyos nga lalaki nga wala nay kinabuhi ang napalgan nga gigaid sa poste sa kuryente nga ang lawas adunay mga samad pinusilan.
Napalgan ang maong lawas sa alas 4:50 sa kaadlawon, Martes, Abril 29, 2025, sa Purok 3, Barangay Punay sudlonon nga bahin sa Lungsod sa Aloguinsan, Sugbo.
Ang biktima giila sa iyang kabanay nga si Robert Genotiva, taga Lungsod sa San Fernando.
Usa ka jogger nga niagi sa maong dapit maoy unang nakadiskubre sa maong lawas nga gihulagway nga gihigot ang maong lalaki sa poste sa kuryente gamit ang plastic, samtang giputos sa itom nga t-shirt ang ulo niini ug nakita nga adunay mga samad pinusilan ang nagkadaiyang bahin sa iyang lawas.
Nakita nga sa ulohan nga bahin sa biktima adunay gipaskin nga karton nga adunay suwat: “Huwag tolaran. Drug pusher.”
Matod ni Police Captain Blane Dunn Tabares ang information officer sa Cebu Police Provincial Office nga padayon pa ang imbestigasyon sa Aloguinsan Police Station aron sa pagsuta sa nahitabo ni Genotiva ingon man ang pag-ila sa responsable sa pagpatay kaniya.
Gituohan ni Tabares nga gilabay lang sa maong dapit ang biktima sanglit wala may nadungog og butobuto sa armas ang mga residente ug wala sab sila makakuha og ebidensya sama sa basiyo sa bala. / AYB