NAILHAN na ang napalgan nga patay’ng lawas nga naglutaw-lutaw sa kadagatan tungod sa Ludo, Jetty Port, sa Barangay Sawang Celero, Dakbayan sa Sugbo sa Dominggo, Hunyo 15, 2025.
Ang biktima giila nga si Arthuro Alcordo, 79 anyos, lumad nga taga Barangay Poblacion, Lungsod sa Boljoon.
Ang iyang ig-agaw nga si Jerson maoy niila kaniya.
Sa pagpakighinabi ni Jerson, misaysay siya nga nakugang na lang sila dihang ilang nahibaw-an sa social media ang gidangatan sa biktima sanglit wala kini mananghid kanila kon asa siya paingon.
Dugang ni Jerson nga duha ka semana na ang nilabay human niuli si Alcordo sa Boljoon gikan sa Manila, apan pagkahuman niadto, nawala na sab kini sa ilang panimalay og wala magpahibalo kon asa paingon.
Sumala niya nga sa iyang nahibaw-an, walay gihambin nga balatian ang biktima ug sakto pa sab kini sa paminsar bisan pa man og nag-inusara na lang kini sa iyang panimalay.
Apan bisan pa man sa nahitabo, niasoy si Jerson nga dili siya makaingon nga dunay foul play ang kamatayon sa biktima sanglit walay nakita nga samad ang lawas niini.
Nasayran nga usa ka concerned citizen nga mag-deliver unta og isda paingon sa Pasil Fish Port ang ni-report sa kapulisan nga duna silay nakit-ang naglutaw ug nag-ubo nga lawas sa usa ka lalaki nga adunay backpack.
Sa pagkutlo ning balita, anaa pa sa punerarya ang patay’ng lawas apan matod sa ig-agaw sa biktima nga nakadesisyon silang ipa-cremate kini. / JDG