GIPAHIBALO sa Department of Migrant Workers (DMW) niadtong Miyerkules, Hulyo 23, 2025, ang pag-abot sa patay nga lawas ni Leah Mosquera, ang overseas Filipino worker (OFW) nga namatay human maigo sa missile sa Israel.
Sa usa ka post sa X, giingon ni Migrant Workers Secretary Hans Leo Cacdac nga malampuson nang nauli si Mosquera.
“Slain Israel OFW Leah Mosquera has returned home,” matod ni Cacdac.
Gawas kang Cacdac, nisugat sab ni Mosquera si Israeli Ambassador sa Pilipinas Ilan Fluss.
Gisubli sa hepe sa DMW ang pasalig sa gobiyerno nga mohatag og hinabang sa pamilya ni Mosquera.
“The DMW and Owwa (Overseas Workers Welfare Administration) shall provide all forms of assistance,” sumala ni Cacdac.
Una nang gipahibalo sa Philippine Embassy sa Tel Aviv ang kamatayon ni Mosquera human gitambalan sa ospital sulod sa usa ka bulan.
Si Mosquera usa sa upat ka mga Pilipino nga nasamdan ug naospital sa Rehovot, Israel tungod sa pag-atake sa missile sa Iran niadtong Hunyo 15. / Anton Banal / Sun.Star Philippines