Nihimo dayon og lakang ang Philippine Basketball Association (PBA) kabahin niining sunodsunod nga pagbiya sa dekalidad nilang mga magduduwa aron manimpalad sa laing torneyo sa gawas sa nasod.
Giaprubahan sa PBA board of governors ang lagda nga pahamtangan og tulo ka mga tuig nga suspensyon ang mga magduduwa nga dili mopirma og kontrata sa ilang mother teams bisan aduna kini maayong tanyag kay mobalhin sa laing liga, sa gawas o sulod man sa nasod.
Gamiton sab kining maong balaudnon sa mga rookie nga dili mopirma og Unified Players’ Contracts nga itanyag sa team nga magpili kanila atol sa drafting.
Magamit sab kini sa mga magduduwa nga dili makig-negotiate og balik o mopirma’g balik og kontrata sa ilang mother teams.
Dili pa lang dugay, sunodsunod nga namiya sa ilang tagsatagsa ka team sila si Arvin Tolentino sa NorthPort Batang Pier, Will Navarro sa Magnolia Hotshots, ug Jamie Malonzo sa Brgy. Ginebra Gin Kings aron manuwa og liga sa gawas sa nasod.
Dili maapektuhan ning maong lagda ang mga magduduwa nga dili makadawat og tanyag sa ilang mother teams sulod sa usa ka buwan gikan sa pag-expire sa ilang kontrata, nga magpahimo kanilang unrestricted free agent. / ESL