Na-finalize na ang plano sa Philippine Basketball Association (PBA) nga mopahigayon og mga duwa sa Dubai ug Bahrian atol sa ika-50 ka tuig nga anibersaryo sa labing unang professional league sa Asya.
Nagkanayon si Commissioner Willie Marcial nga nahitabo kini atol sa iyang pagbisita ning bag-uhay lang sa United Arab Emirates alang sa Basketball Champions League Asia (BCLA) diin nipakita og aksyon ang Meralco Bolts.
“Yung game sa Dubai malamang itong October na. Yung sa Bahrain, baka mag double-header games. Sa December naman yun,” matod ni Marcial nga napatik sa www.pba.ph.
Gipasabot ni Marcial nga ang PBA aduna na’y nahunahunaan kon unsa nga teams ang magkumbati sa nahisgutang mga nasod sa Middle East.
Mao kini ang labing unang higayon nga mopahigayon og duwa ang PBA sa gawas sa nasod gikan niadtong 2019 diin duha ka duwa ang napahigayon sa Dubai nga naglambigit sa Barangay Ginebra Gin Kings, San Miguel Beermen, ug NLEX Road Warriors.
Nidugang si Marcial nga aduna sab plano ang PBA nga mopahigayon og mga duwa sa Saudi Arabia ug Qatar. / ESL