Mga duwa karon:
5:00 pm- NLEX batok Rain or Shine
7:30 pm- Magnolia batok TNT
Sugdan karong Miyerkules, Hunyo 18, 2025, ang quarter-finals sa Philippine Basketball Associaton (PBA) Season 49 Philippine Cup sa Philsports Arena sa Pasig City.
Sa premirong duwa, magsangka ang No. 2 seed NLEX Road Warriors batok No. 7 Rain or Shine Elasto Painters samtang magkrus ang dalan sa No. 3 Magnolia Chicken Timplados Hotshots batok Grandslam seeking TNT Tropang 5G.
Ning mga sangkaa, parehong naggunit ang Road Warriors ug Hotshots og twice-to-beat nga bintaha isip benepisyo sa ilang pagkasulod sa Top 4 human sa elimination round.
Sa bugtong nilang engkuwentro sa elimination round niadtong Hunyo 13, kulbahinam ang nasaksihan diin munasginhawang gibuntog sa Hotshots ang Tropang 5G, 88-83.
Gilauman nga ipagawas sa Tropang 5G ang tanan nilang makaya ning sangkaa aron magpabiling buhi ang ilang paglaum alang sa talagsaong Grandslam title.
Apan labing seguro, tugbangan sa Hotshots ang determinasyon sa Tropang 5G aron makaderetso na sila sa semi-finals series.
Ang Hotshots magsalig og maayo nila ni Paul Lee, Mark Barroca, Zavi Lucero, Will Navarro ug Ian Sangalang samtang ang Tropang 5G mosandig sa katakos nila ni Calvin Oftana, RR Pogoy, ug Poy Erram.
Sa laing duwa, adunay dakong psychological advantage ang Road Warriors batok sa Elasto Painters.
Gumikan kay gawas sa ilang mas taas nga standing, gipangmakmak sab sa Road Warriors ang Elasto Painters, 109-95, sa ilang sangka sa elimination round.
Apan alang ni Road Warriors coach Jong Uichico, dili kini basihan nga makonsiderar silang inilog ning sangkaa ug ang nakabintaha lang kanila kay aduna sila’y twice-to-beat nga benepisyo.
“Hindi pa kami that seasoned, unlike Rain or Shine,” pasabot ni Uichico nga napatik sa www.pba.ph.
“Though they are young, they have some young players, they’re already seasoned.”
Adunay punto si Uichico hilabi na kay ang naggiya sa Elasto Painters mao ang beteranong coach nga si Yeng Guiao. / ESL