Nagtinguha ang Philippine Basketball Association (PBA) nga makabaton og tipik sa ‘Payanig sa Pasig’ property o kon diin nahiluna ang Metrowalk Commercial Complex alang sa posibleng tukoron niini nga kaugalingong arena.
Si PBA Commissioner Willie Marcial ug kanhi Ilocos Sur governor Chavit Singson aduna na’y inisyal nga kasabutan kabahin ning maong plano atol sa Game 1 sa PBA Governors’ Cup finals tali sa TNT Tropang Giga ug Brgy. Ginebra Gin Kings niadtong Dominggo, Oktubre 27, sa Ynares Center sa Antipolo City.
Si Singson, pinaagi sa LCS Group, mao ang nagkontrolar sa Metrowalk property nga nahimutang sa Ortigas Avenue ug Meralco Avenue sa Pasig City.
Basi sa taho sa Esquire, si Singson, pinaagi sa iyang BLEMP Commercial Philippines Inc., maoy tag-iya sa 18.5 ka mga ektarya sa luna sa ‘Payanig sa Pasig’ nga naglakip sa Metrowalk property.
Niadtong Abril, nagkanayon si Singson nga ang iyang kompanya nagplano nga himuon ang maong dapit nga ‘new city’.
Usa sa mga estasyon sa Metro Manila Subway nga padayon pa nga gitukod mosubay sab sa maong dapit.
Nabanhaw kining maong pangandoy sa PBA atol sa planning session sa wala pa magsugod ang 49th season.
Atol sa planning session, nagkanayon si Marcial nga 70 ngadto sa 75 percent na ang purohan nga matuman kining maong pangandoy sa labing unang professional nga liga sa Asya.
Kining maong plano nahimugso niadto pa’ng 2010 dihang si Noli Eala pa ang commissioner apan napadaplin kini sa ninglabay nga katuigan. / ESL