Sa kasamtangan, ang Pilipinas adunay 51 ka mga adlaw nga reserba sa suplay sa lana samtang gipaspasan sa gobiyerno ang mga paningkamot sa pagseguro sa mga stock sa suplay taliwala sa nagpadayon nga gubot sa Middle East, sumala sa gipahibalo ni Presidente Ferdinand R. Marcos Jr. niadtong Martes, Marso 31, 2026.
Sa usa ka video message, si Marcos niingon nga ang Philippine National Oil Company-Exploration Corp. (PNOC-EC) nakahimo na og order sa 1.04 ka milyon ka baril sa krudo (diesel), diin 142,000 ka baril ang napadala na karong semanaha.
Ang uban pang mga kargamento gilauman nga moabot karong bulan sa Abril.
Matod sa Presidente, ang Department of Budget and Management (DBM) nagpagawas na usab og P20 bilyunes aron igasto sa pagpalit og dugang kutob sa duha ka milyunes ka mga baril sa lana nga makalahutay og dugang 10 ka adlaw nga buffer supply.
Gipaneguro ni Marcos sa sayo pa ngadto sa publiko nga ang suplay sa krudo sa nasod igo pa hangtod karong Hunyo 30.
Bahin sa sitwasyon sa enerhiya sa nasod, gikutlo sa Presidente ang Executive Order No. 110, nga nagtugot sa Department of Energy (DOE), PNOC, ug PNOC-EC sa pagpadali sa pagpalit og lana.
Gipirmahan sab niya ang Republic Act No. 12316 niadtong Marso 25, nga nagtugot sa temporaryo nga pagsuspende sa excise taxes sa lana kon gikinahanglan.
Niingon si Marcos nga ang Development Budget Coordination Committee (DBCC) gitakdang magtigom karong semanaha aron tun-an ang posibleng pagpatuman sa maong tax suspension.
Ubos sa EO 110, ang DOE mahimo sab nga morekomendar og mga aksiyon ngadto sa Energy Regulatory Commission (ERC) bahin sa Wholesale Electricity Spot Market (WESM) aron mapalig-on ang presyo sa kuryente.
“Simula March 26, pansamantalang sinuspinde na ng ERC ang WESM. Ibig sabihin, ipatutupad na ang optimal dispatch ng mas murang energy source tulad ng renewable,” asoy ni Marcos.
“Magkakaroon din ng kontrol ang gobyerno sa presyuhan sa WESM. Kasalukuyan itong inaayos na ng ERC,” dugang niya.
Alang sa malungtarong seguridad sa enerhiya, gitudlo ni Marcos ang malampuson nga pag-drill ug testing sa Camago-3 gas well nga gipaabot nga makagama og kutob sa 60 ka milyunes ka cubic feet nga gas kada adlaw.
Iyang gipaneguro nga ang gobiyerno nagpabiling andam sa pagtubag taliwala sa krisis sa lana tungod sa tensiyon sa Middle East. / TPM / Sunstar Philippines