Nisaad si Presidente Ferdinand R. Marcos Jr. niadtong Biyernes nga dugangan ang pundo alang sa mga local government unit (LGU) sa sunod nga national budget, basta mapadayon ang positibong resulta sa mga kasamtangang programa sa hinabang sa gobiyerno sa tibuok nasod.
Gihimo ni Marcos ang maong saad dungan sa iyang pagpangulo sa paglusad sa mga nag-unang inisyatiba alang sa katilingban ug kalambuan ubos sa programang “Sa Bagong Pilipinas, Bawat Bayan Makikinabang” didto sa Batangas Province Events Center sa Batangas City.
“Patuloy po nating gagawin ito at sinasabi ko sa inyong lahat huwag niyong isipin na minsanan lang ito. Ngunit, ibabalik ko rin sa inyo, sa ating mga government official, sa ating mga local government, pagbutihan ninyo itong ginagawa nating mga programang ito,” matod sa Presidente.
Dugang niya, kon nindot ang mahimong resulta niini, mahimong sa sunod nga budget, padak-an pa sa kagamhanan ang pundo para sa maong mga proyekto.
Gitataw ni Marcos nga ang kalampusan sa mga programa sa gobiyerno nagdepende sa lig-on nga kooperasyon tali sa nasudnong kagamhanan ug sa mga LGU.
Matod niya, ang dugang nga pundo ihatag aron mas mapalapdan pa ang maabot niini.
Atol sa maong kalihukan, gidumala ni Marcos ang pag-apud-apod sa rice subsidy ngadto sa mga kwalipikadong benepisyaryo gikan sa mga vulnerable sector, lakip na ang mga mag-uuma, mangingisda, ug mga magtutudlo.
Matag usa kanila nakadawat og 10 ka kilo nga bugas sulod sa unom ka higayon karong tuiga aron makuhaan ang palas-anon sa pagsaka sa presyo sa pagkaon. Gilauman nga kapin sa 235,000 ka mga Batangueño ang makabenepisyo niini.
Gipangulohan usab ni Marcos ang pagtunol sa P200,000 nga pinansyal nga tabang sa matag usa sa 1,078 ka barangay sa Batangas pinaagi sa Local Government Support Fund (LGSF).
Ang maong tabang alang sa mga barangay gibahin sa duha: P100,000 alang sa mga capital outlay projects sama sa patrol vehicles, ekipo, tents, ug pagpataod sa CCTV ug mga suga sa dalan ug laing P100,000 alang sa educational assistance diin matag barangay mosuporta og lima ka deserving presidential scholars nga makadawat og tag-P20,000 matag usa.
Giklaro ni Executive Secretary Ralph Recto nga ang paghatag niini nga tabang kabahin sa usa ka nasudnong programa ug dili lang limitado sa Batangas.
Matod niya, ang administrasyon nagsalikway sa color-coded nga politika o pamolitika sa paghatag og serbisyo.
Gibutyag ni Recto nga dul-an sa P1.4 trilyon ang gigahin alang sa mga LGU sa 2026, lakip na ang kapin sa P57 bilyunes ubos sa LGSF.
Gipasalig niya nga adunay gisunod nga formula sa pagbahin sa pundo aron maseguro nga walay “kupit o puslit” ug maseguro ang transparency sa paggamit niini. Suma sa data sa gobiyerno, sa pagka-Abril 16, moabot na sa P15 bilyon ang nagawas sa tibuok nasod ubos sa LGSF. / PNA
