Mokabat sa 204 ka ka sea vessels ang narehistro sa Philippine Coast Guard( PCG) Central Visayas nga mosalmot sa Seaborne Procession karong Sabado sa buntag, Enero 20 , 2024.
Gipahibalo ni Commander Mark Larsen Mariano, PCG Central Cebu commander, nga subay sa uwahing ihap, naglabi sa pagparehistro ang mga motorbanca.
Sa ilang talaan, 139 ka mga motorbanca; 31 ka merchant vessels; 24 ka mga tug boats, unom ka mga yate, tulo ka aluminum boats ug usa ka speed boat ang niparehistro.
Unang nasayran nga sa labing unang higayon sa Sinulog ug Fiesta Señor nga selebrasyon, ang Balaan nga Pamilya, nga gilangkuban sa patron nga imahen ni St. Joseph the Worker, Virgen de Guadalupe de Cebu, ug Señor Sto. Niño, moapil sa seaborne procession.
Ang seaborne event maoy re-enactment sa pag-abot sa barko ni Ferdinand Magellan sa baybayon sa Sugbo, nga nagdala sa imahen sa Balaang Bata niadtong ika-16 nga siglo, nga nagsimbolo usab sa pag-abot sa Kristiyanismo sa Pilipinas.
Samtang, ang tagdumala sa Cebu-Cordova Link Expressway nipahibalo nga gidili ang paghunong sa mga sakyanan sa taytayan ug sirhan ang jogging area atol sa prosesyon.