Gipaabot sa mga opisyal sa Dakbayan sa Lapu-Lapu ang katapusang “no objection” certificates gikan sa Philippine Coast Guard (PCG) ug Maritime Industry Authority (Marina) 7 sa dili pa ilibkas ang temporaryong pagsuspenso sa mga operasyon sa pagguba sa barko sa M/V Diamond Highway, usa ka grounded car carrier sa Barangay Punta Engaño.
Nahunong ang shipbreaking niadtong Enero 2024 human si kanhi Mayor Junard “Ahong” Chan mipagawas og cease and desist order (CDO) nunot sa mga reklamo sa panglawas gikan sa duol nga mga residente, lakip na ang mga taho sa skin rashes, respiratory problems, ug throat irritation.
Ang M/V Diamond Highway, nga nasangad atol sa Super Typhoon Odette niadtong Disyembre 2021 ug sa ulahi nasunog niadtong Abril 2023 atol sa pagbungkag niini, nahimong tinubdan sa mga kabalaka sa kalikupan ug panglawas sa publiko.
Si City Legal officer James Allan Sayson nitug-an sa mga tigbalita niadtong Huwebes, Agusto 14, 2025, nga ang City Government nagpaabot pa sa official clearance gikan sa Marina 7 ug PCG 7 aron ipadayon ang pagbungkag.
“This is an official letter addressed to city officials [requesting] for a no objection or clearance from Marina and the Coast Guard. So, we will have to comply,” matod ni Sayson
Ang City Legal Office nipahibawo na sa mga operator sa barko sa mga requirement.
Matod ni Sayson, ang proseso sa clearance nagsunod sa mga rekomendasyon gikan sa City Health Office (CHO) ug sa City Environment and Natural Resources Office (CENRO), human ang mga sanitary inspectors nakamatikod sa daghang mga procedural violations atol sa inisyal nga pagbungkag.
Mokabat sa 100 ka mga residente gikan sa Sitios Proper Jansen, Lupa, Colo, ug Mangal ang nagtaho sa nagkalainlaing mga isyu sa panglawas nga giingong tungod sa fiber dust ug airborne pollutants gikan sa shipbreaking site./ DPC