GIHULIPAN na sa katungdanan ang Regional Director sa Philippine Drug Enforcement Agency (PDEA) 7 nga si Alex Tablate ni Director III Joel Plaza.
Si Tablate gibalhin sa PDEA Region 10 isip regional director subay sa kamanduan sa ilang ulohang buhatan.
Gipasigarbo ni Tablate ang iyang mga nahimo sa Central Visayas sa iyang paglingkod isip pangulo sa PDEA 7.
Niadtong Nobiyembre 4, 2024, nilingkod isip hepe sa PDEA 7 si Tablate ug sulod lang sa walo ka buwan, nakasakmit sila og P885,590,819.96 nga balor sa ilegal nga drugas atol sa 253 ka anti-illegal drug operations.
Nakabungkag sab ang PDEA 7 og 36 ka drug den, 346 ka drug suspects ang nangadakpan, ug 129 kilos nga shabu, 3 kilos nga dahon sa marijuana ug 1,116 ka tabletas sa Ecstasy ang nasakmit.
Makatulo kahigayon na sab siya nga nakasunog og ilegal nga drugas nga ang tanan moba-lor sa kapin P1.3 bilyunes.
Sa iyang paglingkod sa PDEA 7, nakadeklara sab sila og 69 ka barangay nga drug cleared. / AYB