Bag-o na ang hepe sa Philippine Drug Enforcement Agency (PDEA) 7 human hulipi sa katungdanan si Director III Jigger Montallana nga mao na karon ang Service Director sa International Cooperation and Foreign Affairs Service sa ilang ulohang buhatan.
Matod ni Leia Alcantara, information officer sa PDEA 7, nga ang gitudlo nga modumala sa ilang buhatan mao si Director III Emerson Margate.
Si Margate una nang nahimong regional director sa PDEA 7 niadtong 2017-2018 apan gibalhin kini sa Region 10 sa Cagayan de Oro City.
Nipasabot si Alcantara nga ang pag-reshuffle sa regional directors sa ilang mga buhatan dili makaapekto sa ilang programa nga nasugdan na sama sa drug-clearing program ug ang ilang mandato nga mao ang pagpuhag sa illegal nga drugas sa matag rehiyon.
“Yes, Sir. Padayon ra ato mga programs and mga planned activities. Part ra ni sa usual operation sa agency, ang change in leadership,” matod ni Alcantara.
Dugang niya nga gawas sa regional director (RD), apektado sad ang deputy regional director apan wala pa sila moanunsyo kon kinsa, sanglit si Outgoing Deputy RD Director II Benjamin Recitas III ibalhin usab og laing rehiyon.