PDEA 7 maniid sa midaog sa BSKE

Gisusi karon sa Philippine Drug Enforcement Agency (PDEA 7) kon duna bay mga midaog sa Barangay ug Sangguniang Kabataan Elections (BSKE) nga nalam­bigit sa illegal nga drugas.

Matod ni Leia Alcantara, information officer sa PDEA 7, nga sa iyang personal nga nahibaw-an dunay duha ka kandidato sa Central Visayas nga tiggamitan sa illegal nga drugas sama sa shabu apan pulos kini napildi.

Nagtuo si Alcantara nga nasayod na ang mga silingan niini sa barangay nga tiggamitan sa illegal nga drugas ang maong kandidato nga maoy hinungdan nga naparot kini sa election.

Apan ila pang ipaubos sa validation kon duna bay nakadaog sa milabayng election nga nalambigit gyud sa illegal nga drugas.

“Ako na i-double check sa intelligence kay as of today wala koy update, ang akong nahibal-an gyud naay katong nidagan napildi, unfor­tunately napildi sila,” matod ni Alcantara.

Magpadayon ang tinguha sa PDEA 7 nga malimpyo sa illegal nga drugas ang tanang barangay sa Central Visayas ug angayan nga magsugod kini sa elected officials.