ARON mas mapalapdan ug mapalig-on ang operasyon sa pagtubag sa mga emerhensya ug kalamidad, giduso ni Bokal Celestino “Tining” Martinez ang ordinansahon paghimo sa Provincial Disaster Risk Reduction and Management Office (PDRRMO) isip fully operational nga department.
Matod ni Martinez nga dako kini og ikatabang ilabi na nga matag tuig adunay gibanabana nga moabot siyam o sobra pa nga mga bagyo nga molabay sa Philippine Area of Responsibility (PAR).
Una na nga giduso ni Martinez ang ordinansa sa kanhi administrasyon ni Gobernador Hilario Davide III apan gibalik kini isip division sa administrasyon ni kanhi Cebu Governor Gwendolyn Garcia.
Ang kasamtangan nga gobernador nga si Pamela Baricuatro una nang nipadayag sa iyang tinguha nga ibalik isip buhatan ang PDRRMO tungod sa dakong panginahanglanon sa pagtubag sa kalamidad lukop Probinsiya sa Sugbo.
“Right now with the incidents nga rampant na kaayo and the other kadtong mga typhoons and weather disturbances karon flooding na sad. So I think its really high time that we reconsider nga ibalik na sad ang PDRRMO into a department,” matod ni Martinez sa Hulyo 21, 2025.
Dugang ni Martinez nga dako kini og ikatabang ilabi na nga kon mapatuman kini makadugang na og personnel ug mga experto.
Si PDRRMO Head Denise Pastor nipadayag usab sa iyang positibo nga paglantaw sa ordinansahon nga gituki atol sa ikaduhang session sa hunta probinsyal sa Lunes, Hulyo 21.
Sa kasamtangan, ang PDRRMO naglihok isip division nga may tulo lamang ka mga personnel.
Kon kini mapasar, gilantaw ni Pastor nga mogama og tulo ka grupo nga may pito ka miyembro kinsa nahanas sa paggamit sa insaktong mga ekipo, teknolohiya ug uban pang kahimanan alang sa epektibong response.
Lakip na niini ang pagpalit og dugang mga ekipo alang sa mas dali nga response. / ANV