Nanawagan ang Provincial Disaster Risk Reduction and Management Office (PDRRMO) sa umaabot nga administrasyon sa Probinsya sa Sugbo nga suportahan ang ilang buhatan pagpalig-on sa disaster preparedness, mitigation, response, ug recovery initiatives aron matubag ang pag-usab-usab sa panahon ug mga geological hazards.
Kini nga panawagan gipadayag atol sa news forum niadtong Martes, Hunyo 10, 2025, ni PDRRMO head Neil Sanchez subay sa pagpangandam alang sa pagselebrar sa National Disaster Resilience Month sa Hulyo.
Giangkon sa mga opisyal nga bisan kung ang ilang tumong mao ang pagsiguro sa kaluwasan sa publiko, maglisod sila pagkumbinsir sa mga tawo nga hunongon una ang ilang panginabuhi kon dunay katalagman.
Kini usa ka dugay nang isyu alang sa PDRRMO.
“Focus kaayo ta sa pagbutang sa mga tawo sa safe areas, evacuating them in safe areas. What about their livelihood? Di man gyud kalikayan naa man gyuy mobalik,” matod ni Sanchez.
Gibutyag niya nga kining problemaha di lang dinhi sa Pilipinas apan hagit sab sa ubang mga nasod, apil na ang mga first-world nations.
Gihimong sanglitanan ni Sanchez ang usa ka trahedya sa Dakbayan sa Naga, nga usa ka 75 anyos nga lalaki ang gianod sa baha samtang nag-atiman sa iyang kabaw, bisan pa sa advisory sa Pagasa bahin sa kusog nga ulan niadtong Hunyo 7.
Gipasabot usab ni Sanchez nga bisan pa sa paningkamot sa PDRRMO sa pagluwas og kinabuhi, ang sayop nga impormasyon nakababag sa pag-ila ug pagsalig sa publiko sa ilang mga aksyon.
“While the government, our National Government partners, our local government units are doing their best para pag-evacuate, kinahanglan gihapon ta og kuan (cooperation) sa katawhan kay sila man gyud ang grabeng maapektohan ani nga aspeto,” dugang ni Sanchez.
Ang PDRRMO nag-una sa pagpangandam sa kalamidad, nagtinabangay sa Pagasa aron makahatag og tukmang advisories ug mogiya sa mga desisyon sa pagkanselar sa klase ug mga pagbakwit.
Ang Republic Act 10121, nailhan usab nga Philippine Disaster Risk Reduction and Management Act of 2010, nagmando sa mga chief executive nga mohimog tukmang aksyon kon gikinahanglan, sama sa pagkansela sa klase. / Divina Grace Bendanillo, CNU Intern