MOBALIK sa boxing spotlight si Dave Peñalosa para sa World Boxing Foundation (WBF) Silver lightweight title kontra sa bag-ong Chinese prospect nga si Weiyi Jiang sa main event sa “Fist of Fury VII: Philippines vs. China” sa Hunyo 28, 2025, sa Brgy. Tinago Gym, Cebu City, pinasikad sa Chao Sy Boxing Promotions.
Human sa duha ka tuig nga pahulay, ang 34-anyos nga si Peñalosa mipili nga mopadayon sa iyang career ug nibalik karong tuiga. Kanhi WBO Oriental featherweight champion, si Peñalosa nakab-ot ang titulo niadtong 2019 human mopilde sa Mexican nga si Marcos Cardenas pinaagi sa ika-upat nga round TKO. Sa samang tuig, narekord ang iyang unang kapildihan sa kamot ni Lerato Dlamini pinaagi sa unanimous decision sa WBC Silver featherweight title bout.
Si Jiang, nga misulod sa pro boxing niadtong 2023, naghupot og record nga 2-1 (1 KO). Misugod siya og maayong momentum human gilupig si Manot Comput sa ikaupat nga round stoppage, gisundan og split decision win batok kang Ok Kyu Choi, apan napildi siya sa iyang ikatulong away batok kang Nukul Nimmak pinaagi sa unanimous decision.
Si Peñalosa, anak sa two-division world champion nga si Dodie Boy Peñalosa, karon may record nga 19-1 uban sa 12 ka knockout wins.
Sa co-main event, magtagbo ang walay pilding si Vicente Unidos (4-0, 3 KOs) batok sa Chinese nga si Touhatasen Sailibieke (5-0, 3 KOs).
Sa undercard, si Jefre Jimenez (4-0, 2 KOs) makigduwa kang Marlon Alejandro (6-7-2, 1 KO) samtang si Jemuel Aranas (6-2, 3 KOs) mokombate kang Anthony Gilbuela (8-7-3, 2 KOs). Ang tibuok fight card ablihan sa mga amateur bouts. / RSC gikan kang EKA