Sa pagtuo ni kanhi two-division world champion Gerry Peñalosa, aduna pa’y igong kapabilidad si Filipino boxing legend Manny Pacquiao nga makarehistro og knockout nga kadaugan sa pagbalik niini og away human sa dul-an sa upat ka mga tuig nga pagretiro.
Sa iyang pagbalik og away, suwayan pag-ilog ni Pacquiao ang korona ni World Boxing Council (WBC) welterweight champion American Mario Barrios karong Hulyo 19, 2025 (US time) sa MGM Grand Garden Arena sa Las Vegas.
Sa interbyu sa GMA Integrated News, giangkon ni Peñalosa nga apil siya sa mga nabalaka kabahin sa pagbalik og away sa iyang higalang 8-division world champion tungod sa pangidaron niini nga 46.
Hinuon masaligon si Peñalosa nga dili magpasagad si Pacquiao ug mangandam kini’g insakto alang ning awaya.
Matod ni Peñalosa aduna gihapon saktong kusog si Pacquiao ug kon mataymingan niini si Barrios hayan mahuman ang away. / ESL