Padayon ang pagsidlak ni Dave Peñalosa sukad sa iyang pagbalik sa ring sa miaging tuig.
Kini human gilupig ni Peñalosa ang Chinese fighter Jiang Weiyi pinaagi sa unanimous decision sa main event sa World Boxing Foundation (WBF) Silver lightweight title bout atol sa "Fist of Fury: Philippines vs. China" nga gi-organisar sa Chao Sy Boxing Promotions niadtong Sabado sa gabii, Hunyo 28, 2025, sa Brgy. Tinago Gym, Cebu City.
Giisa ang kamot sa 34-anyos nga si Peñalosa human sa walo ka rounds nga aksiyon pinaagi sa unanimous nga desisyon gikan sa tulo ka judges, sa identical scores nga 77-75.
Ikatulo na kini nga sunodsunod nga kadaugan ni Peñalosa sukad nibalik siya sa ring human sa duha ka tuig nga pahulay. Misaka ang iyang record sa 20-1 uban sa 12 ka knockouts, samtang si Jiang natagak sa 2-2 record uban sa usa ka knockout.
Sa co-main event, namansahan ang perpekto nga record ni Vicente Unidos human siya napildi sa Chinese nga si Tuohatasen Sailibieke sa split decision.
Duha ka judges ang mipabor kang Sailibieke sa iskor nga 75-74, samtang ang usa ka judges nihatag kang Unidos, 76-73.
Tungod sa maong kapildihan, nahagbong si Unidos sa 4-1 record uban sa tulo ka knockouts, samtang nagpabiling walay pildi si Sailibieke sa 6-0 record nga adunay tulo ka knockouts.
Sa undercard, nakuha ni Jefre Jimenez (5-0, 2 KOs) ang Philippine Boxing Federation (PBF) light-flyweight belt sa unanimous decision batok kang Marlon Alejandro (6-8-2, 1 KO).
Gipilde ni Jemuel Aranas (7-2, 4 KOs) si Anthony Gilbeula (8-8-3, 2 KOs) pinaagi sa kontrobersiyal nga stoppage sa ikalima nga round. (RSC gikan kang EKA)