Gibuhian ni ex-officio member Nick Pepito ug Philippine Councilor’s League (PCL) ang iyang chairmanship sa Committee on Environment ubos sa 17th Sangguniang Panlalawigan sa Lunes, Hulyo 28, 2025.
Kini human nipadayag si Pepito sa iyang tinguha sa pagbuhi sa posisyon tungod sa dili na niya maato nga trabahuon sa PCL diin gikinahanglan og dako nga oras ug panahon aron kini matutokan.
Matod ni Pepito nga nahibalo siya sa ka importante sa komitiba apan labaw sab ang iyang tulubagon sa pagpangulo sa mga konsehal sa tibuok lalawigan.
“Ang PCL man gud atong i-cover ang whole province of Cebu unya kahibalo baya ka nga ang ubang LGU lagyo kaayo, so we need to address didto,” matod ni Pepito sa Hulyo 28, 2025.
“Anyway Stanley is the right person, actually pulos man sila makamao tanan but Stanley is being a senior board member and also a bookworm so siya ang angayan para nako,” dugang ni Pepito.
Hinuon gipasalig ni Pepito nga dili niya biyaan sa pagsuporta ang komitiba sanglit malakip gihapon siya isip miyembro niini.
Subay niini, gitudlo sa hunta probinsyal nga bag-ong chairman sa komitiba si bokal Dr. Stanley Caminero sa segundo distrito. Natudlo sab isip Vice-Chairman si Antonio Bacaltos sa unang distrito.
Subay niini, bukas nga gidawat ni Caminero ang bag-ong komitiba. / ANV