Gipangulohan sa Sugboanong rider nga si BJ Enage Pepito ang mga mananaug sa bag-uhay lang nahuman nga 25th Ornopia Motocross Cup sa MS Motosuit Motorsport Park sa Barangay Calambua, lungsod sa San Remigio, amihanang Cebu.
Ang gitawag og “Wonder Boy” gikan sa Daanbantayan maoy naghari sa expert open category sa makasaysayong lumba, nga gipasiugdahan ni MS Motosuit big boss ug San Remigio Councilor Lou Ornopia isip pagsaulog silver anniversary sa kompetisyon.
Si Pepito, kinsa usa sa labing kuyaw nga produkto sa Ornopia Cup, nilupig sa dekalidad sab nga riders nga sila si PC Gualiza ug Clinton Gualiza nga maoy miangkon sa ikaduha ug ikatulong luna.
Mikompleto sa top 5 mao sila si Renren Hisoler ug Denden Supatan.
Si PC Gualiza nibawi pinaagi sa pagsakmit sa kampyunato sa inter-open division diin iyang nalupig sila si Denden Supatan ug Renren Hisoler.
Nipatigbabaw sa elite division mao si Dave Seblos, kinsa gisundan nila ni James Duroy ug Roniel Borgonia.
Si Aston Martin Jagdon maoy mikampyon sa open enduro diin nagsunod kaniya sila si Alejar Landero ug Jay Motano.
Sa local enduro, si Jondy Bontuyan ang nikuha sa titulo samtang nagsunod kaniya sila si Tommy Largosa ug Justine Arcayan.
Nipatigbabaw sa novice open enduro mao si Joshua Tabas, kinsa gisundan nila ni Jondy Bontuyan ug Laurence Bacalso.
Nagpaila na’g sugod si Laurence Bacalso pinaagi sa pagdaug sa beginners open diin iyang gilupig sila si Ken Lara ug Keizer Ornopia.
Misidlak si Ken Lara human niya nadaug ang mini class hasta si Mat-Mat Velasquez, kinsa maoy nipatigbabaw sa pewee/mini 50cc.
Ang ubang mga ningdaug mao sila si Shanyl Quirol sa ladies open, Nica Quirol sa female 14 Under class, Jun-Jun Agsoy sa underbone, Jondy Bontuyan sa KLX exclusive, Ryan Quirol sa executive (40-44), Ayen Ledesma sa executive (45-49), Jonathan Cuyos sa executive (50-above), Edwin Dilao sa exclusive Norte, ug Jayme Mangubat sa trail riders Norte. / ESL