Gipanghipos na sa mga sakop ni outgoing Cebu Governor Gwendolyn Garcia ang iyang mga personal nga butang sa Kapitolyo.
Apil kini sa proseso sa pormal nga pagbiya sa gobernador sa kapitolyo sa Hunyo 30, 2025.
Si Maritess Alcos, pangulo sa Provincial General Services Office (PGSO) nikompirmar nga nagsugod ang pagpanghipos niadtong hinapos nga bahin sa Mayo.
“Yes, we confirm that Governor Garcia has officially initiated the separation of her personal belongings from properties owned by the Provincial Government at the Capitol,” matod ni Alcos.
“To clarify, this process involves separation, not clearing, and began in the last week of May, immediately following the physical inventory conducted by the Provincial General Services Office (PGSO) and the Accounting Department,” dugang niini.
Gawas sa governor's office, nanghipos na sab sa ilang mga butang ang Tourism Office ug Provincial Information Office.
Aron masiguro nga dili masagol ang mga personal nga butang ni Garcia sa butang sa kapitolyo, adunay grupo nga gitahasan sa paghimo niini.
“Logistics for this process have been systematically coordinated through the preparation and inspection of property passes, ensuring secure handling and clear accountability for all personal and government-owned items involved,” matod ni Alcos.
Giklaro usab niya nga ang tanang mga butang, sama sa lamesa, mga bangko, paintings, flower vase, ug uban pa gipaubos sa documentation ug inventory pinasubay sa auditing guidelines.
Bisan pa og wala pa ang pormal nga pagkanaog ni Garcia, giingong kanunay na gihimo ang inventory sa dili pa matapos ang matag tuig diin tanan nga reports kinahanglan usab nga isumiter sa Commission on Audit (COA) pagsiguro sa full transparency.
Atol sa pagbisita sa Superbalita Cebu sa opisina ni outgoing Cebu Governor Gwendolyn Garcia, hawan na sa kaugalingon niyang mga butang ang maong opisina.
Sa nasayran ang opisina ni Garcia maoy himoan sa mga tigum, conferences, salu-salo ug pagdawat og mga bisita sa local, national, ug international.
Karong Hunyo 30, 2025 sa alas 12:00 sa udto maoy uwahing adlaw ni Garcia sa maong opisina subay sa pagpuli na sa bag-ong administrasyon ni Governor-elect Pamela Baricuatro. / ANV