Nasugamak sa wala damhang kapildihan si Filipina Nesthy Petecio batok sa batan-ong si Julia Szeremeta sa Poland sa women’s boxing 57 kg division sa Huwebes sa kadlawon, Agusto 8, 2024 (PH time) sa Roland Garros Arena sa France.
Si Petecio, kinsa silver winner sa niaging edisyon sa matag upat ka mga tuig nga kompetisyon sa Osaka, Japan, mobalik sa Pilipinas nga bawon ang bronze medal ning higayuna.
Ang surpresang resulta maoy nakapakgang sa gikahinamang panagharong unta nila ni Petecio ug sa dugay nang karibal niini nga si Lin Yu-ting sa Chinese Taipei sa gold medal match.
Si Lin, kinsa nalambigit sa kontrobersya gumikan sa pagkahagbong niini sa gender test sa 2023 World Championships, nisulod sa finals pinaagi sa 5-0 nga kadaugan batok ni Esra Yildiz sa Turkey sa laing semi-final bout.
Nakuha unta sa 32 anyos nga si Petecio ang kadaugan sa 1st round diin nipabor kaniya ang tanang lima ka judges.
Apan sa 2nd round, nibawi ang 20 anyos nga si Szeremeta ug nidaog siya sa upat ka judges.
Sa 3rd round, nidaog na si Szeremeta sa tanang lima ka judges aron angkunon ang katungod sa pagpakibatok ni Lin sa gold medal bout.
Ang kapildihan ni Petecio maoy nagtuldok sa kampanya sa Philippine boxing sa kompetisyon.
Ang Philippine boxing, nga wala pa sukad nakabira og Olympic gold, nakadawat sab og laing bronze medal gikan ni Aira Villegas sa women’s flyweight class.
Ang ubang mga boksidor sa Pilipinas sa Paris Games nga sila si Carlos Paalam ug Eumir Marcial wala damha nga wala’y nakuha nga medalya ning higayuna.
Si Paalam usa ka silver medalist samtang si Marcial bronze winner sa Tokyo Games. / ESL