Nagkaduol na sa medal round ang pambato sa Pilipinas nga si Nesthy Petecio human sa impresibo nga kadaugan batok ni world No. 3 Amina Zidani sa France, 4-1, sa women’s featherweight class sa Paris Olympics kagahapon, Agusto 3, 2024 (PH time).
Wa magpaapekto si Petecio sa homecourt advantage ni Zidani nga gipaluyohan sa lanog nga abiba sa mga Pranses.
Hinay ang sugod ni Petecio sa unang round nga maoy rason nakakuha og labaw ang homecourt boxer, apan nibalos siya sa sunod nga mga round.
Niagresibo si Petecio ug nakaigo og clean punches sa iyang kontra.
Sa 1:44 mark sa second round, nibuhi og right hook si Petecio nga mipatumba kang Zidana, ang duha ka gloves niini mihikap sa canvas. Apan wa kini tawgi sa referee og knockdown.
Nagpadayon sa dominasyon si Petecio hangtod sa final round.
Upat ka judges ang ningpabor sa Filipina boxer sa iskor nga 30-27, 29-28, 29-28, 29-28 samtang ang nahabilin nga usa lahi ang nakita ug nihatag sa iskor nga 29-28 kang Zidani.
Ang Tokyo Olympic silver medalist nga si Petecio mokontra kang Zichun Xu sa China karong alas 9:30 sa gabii, Agusto 4, sa quarterfinals.
Niining pagsuwat, nakigtigi ang ubang Filipino athletes alang sa medalya ug luna sa sunod nga round sa Olympics.
Si Carlos Yulo sa finals sa artistic gymnastics men’s floor exercise, Carlo Paalam kontra Charlie Senior sa Australia sa men’s 57kg quarterfinals, ug EJ Obiena sa qualification round sa men’s pole vault sa Sabado sa gabii. / RSC