Usa ka petisyon ang gisang-at sa Korte Suprema (SC) nga nagtumong sa pagbabag sa pagpatuman sa Republic Act (RA) 12027, nga nailhan usab nga “Act Discontinuing the Use of the Mother Tongue as Medium of Instruction from Kindergarten to Grade 3.”
Ang petisyon gisang-at sa mga tigpasiugda og pinulongan nga gipangulohan sa Tanggol Unang Wika Alliance (TUWÂ) kauban ang mga bata sa eskwelahan ug ilang mga ginikanan ug magtutudlo, mga grupo sa lumad Bangsamoro, mga bungol, ug uban pa’ng minoriya sa pinulongan niadtong Hunyo 30, 2025.
Sa ilang petisyon, ilang tinguha nga ihunong ang RA 12027 ug ideklarar kini nga wala nahiuyon sa konstitusyon.
Ning maong lagda, nga nahimong balaod niadtong Oktubre 10, 2024, bisan walay pirma sa presidente, ang mother tongue kuhaon isip medium sa pagtudlo alang sa mga estudyante gikan sa kindergarten hangtod sa Grade 3, ug ibalik ang Filipino ug English lang isip medium sa pagtudlo.
Sa usa ka pahayag, gitumbok sa TUWÂ ang katungod sa tawo sa kagawasan sa pagpahayag ug pagkab-ot og kalidad nga edukasyon.
Matod ni Dr. Ricardo Ma. Duran Nolasco, usa ka convenor sa TUWÂ, ang RA 12027 nakalapas sa katungod sa mga Pilipino nga makakat-on sa pinulongan nga ilang hingpit nga nasabtan, sumala sa nakalatid sa Konstitusyon sa Pilipinas, mga lokal nga balaod, ug international conventions.
“The law purportedly allows the optional use of the (mother tongue] in monolingual classes. TUWÂ denounces this as a pampalubag loob because most classes are multilingual,” matod ni Nolasco.
“Moreover, burdensome hurdles, such as encyclopedias and other materials, language mapping activities and proficiently ‘trained’ teachers, are required by legislators before learners can use their strongest oral and sign language in school. The use of English and Filipino is exempt from these conditions which makes the law highly discriminatory.”
Sugyot ni Nolasco nga ang mga makalapas pahamtangan og administratibong mga silot.
Gireklamo usab sa mga nagpetisyon ang parehas nga estado nga gihatag sa English ug Filipino isip medium sa pagkat-on kay ang Filipino mao ang nasudnong pinulongan samtang wala kaabot og duha ka mga porsiyento ang lokal nga mga lumolupyo ang naggamit sa sinultiang English.
Matod ni Nolasco nga gibanabanang mobot sa walo ka milyon ka mga estudyante sa grade school ang maapektuhan ning maong balaod. / TPM / SunStar Philippines