GIBASURA sa korte sa Pasig ang petition for bail nga gisang-at sa nabilanggo nga lider ug founder sa Kingdom of Jesus Christ (KOJC) nga si Pastor Apollo Quiboloy, uban sa iyang lima ka kauban nga akusado sa kaso nga may kalabutan sa qualified human trafficking tungod sa sexual abuse ug labor exploitation.
Sa desisyon gipetsahan niadtong Hulyo 20, 2025, gisalikway sa Pasig Regional Trial Court (RTC) Branch 159 ang tagsa-tagsa nga petisyon ni Quiboloy ug sa iyang kauban nga sila Sylvia Cemañes, Paulene Canada, Jackielyn Roy, Cresente Canada, ug Ingrid Canada—kanhi opisyal sa KOJC.
Gisubli sa korte nga lig-on ang ebidensya nga gipresentar sa prosekusyon nga nagpalig-on sa ilang akusasyon batok sa mga gidudahan nga gihulagway nga qualified human trafficking nga gihimo sa usa ka sindikato.
Ang mga kaso gisang-at batok ni Quiboloy ug sa iyang mga kauban gikan sa mga kanhi miyembro sa KOJC nga nipasangil nga nakasinati sila og pag-abuso gikan sa relihiyosong lider.
Gidakop si Quiboloy niadtong Septiyembre 8, 2024, human sa kapin duha ka semana nga pagpangita sulod sa compound sa KOJC sa Dakbayan sa Davao. / TPM / SunStar Philippines