Nibangon gikan sa 21 ka mga puntos nga pagkalubong sa 2nd quarter ang host Gilas Pilipinas aron lupigon ang bisitang Macau Black Bears, 103-98, sa usa ka tune-up game niadtong Lunes sa gabii, Hulyo 28, 2025, sa Smart Araneta Coliseum.
Ang kadaugan gilaumang makahatag sa Gilas og dugang kadasig alang sa ilang umaabot nga misyon – ang Fiba Asia Cup, nga ipahigayon karong Agusto 5-17 sa Jeddah, Saudi Arabia.
Sama sa naandan, ang Gilas gipangulohan ni naturalized player Justin Brownlee pinaagi sa iyang 32 puntos, 15 rebounds, ug lima ka assists.
Nahimo kini ni Brownlee bisan mao pa lang kini ang labing una niyang pagduwa’g balik human siya nakasinati og angol (dislocated thumb) atol sa Philippine Basketball Association (PBA) Season 49 Commissioner’s Cup finals series tali sa iyang puwersa nga Brgy. Ginebra Gin Kings ug TNT Tropang 5G.
Pagsugod pa lang sa duwa, nagpauwan na og three-point shots ang Black Bears nga maoy naghatag kanila og 21 puntos nga labaw sa hinapos nga bahin sa 2nd quarter.
Naglabaw gihapon og dako ang Black Bears sa halftime, 63-46.
Ang kilas nga pointguard nga si CJ Perez, kinsa wala niduwa sa 1st half, maoy nidugkat sa dakong rally sa Gilas pagsugod sa 3rd quarter.
Ning maong rally gimugna ni Perez ang tanan niyang pito ka mga puntos nga daw naghatag og dugang enerhiya sa Gilas.
“We just have to keep doing what we’re doing. I thought we had two really good weeks of practice even though we didn’t have a full crew,” matod ni Gilas coach Tim Cone nga napatik sa www.pba.ph.
“I thought with that two good weeks of practice, we’ve got to be able to execute a little bit better.”
Nagkanayon si Cone nga nagamit sa iyang mga batos ang ilang gipraktisan og maayo pagsugod sa 3rd quarter.
Ang Gilas, nga molarga karong adlawa paingon sa Jeddah, ningkombati nga wala ang duha sa ilang mga sinaligan apan adunay angol nga sila si June Mar Fajardo (calf), ug Calvin Oftana (sprain).
Puntos matag usa:
Gilas Pilipinas (103) - Brownlee 32, Ramos 19, Edu 15, Quiambao 14, Thompson 10, Perez 7, Newsome 2, Malonzo 2, Abarrientos 2, Aguilar 0, Tamayo 0.
Macau Black Bears (98) - Douglas 23, Amorie Anthony 22, Leung 17, Peek 14, Shackleford 7, Millora-Brown 6, Dennis 5. Quarterscores: 25-33; 46-63; 79-81; 103-98. / ESL