NASUGAMAK sa laing kapildihan ang Gilas Pilipinas batok sa New Zealand Tall Blacks, 86-94, niadtong Huwebes sa lawom sa gabii, Agusto 7, 2025 (PH time), 86-94, sa FIBA Asia Cup sa King Abdullah Sports City sa Jeddah, Saudi Arabia.
Kini maoy ikaduhang sunod-sunod nga kapildihan sa Gilas sa samang gidaghanon nga mga duwa ning prestihiyusong kompetisyon, nga ipahigayon matag upat ka mga tuig.
Sama sa premiro nilang kapildihan batok sa Chinese Taipei, 87-95, ang Gilas kanunay sab nga naggukod sa duwa.
Ang Tall Blacks nagpauwan og sunodsunod nga three-pointers nga maoy naghatag kanila sa ilang labing dakong labaw sa duwa, 55-37, sa ulahing bahin sa 2nd quarter.
Ning puntoha, 9-of-15 three--point shooting ang narehistro sa Tall Blacks, nga ningsaka sa 2-0 nga rekord.
Sa pagpangulo ni natura-lized player Justin Brownlee, Dwight Ramos, ug June Mar Fajardo, ang Gilas inanay nga ninggukod hangtod nga ilang napahak ang labaw sa Tall Black, 85-82, sa nahabiling 3:48 minutos.
Apan human niini, nainat na sab sa Tall Blacks ang ilang labaw ngadto sa dobleng numero nga puntos sa pagpangulo nila ni Jordan Ngatai ug Taylor Britt, kinsa mao gyud ang naghatag og grabeng labaw sa ulo sa Gilas gikan sa sinugdan hangtod sa katapusan.
“We’re disappointed that we lost two in a row. I don’t think we all saw that coming,” matod ni Gilas coach Tim Cone.
“We’re obviously struggling in the first halves, and we couldn’t just get over the hump.”
Taliwala ning laing kapakyasan, buhi pa ang paglaom sa Gilas ug kinahanglang lang nilang mabuntog ang Iraq sa katapusan nilang tahas sa Group D karong Sabado, Agusto 9, sa alas 4:00 sa hapon.
Sama sa Gilas, ang Iraq wa pa sab daog sulod sa duha ka mga duwa.
Ang modaog tali sa Gilas ug Iraq mao ang mahimong No. 3 team sa Group D samtang ang mapilde manamilit.
Ang No. 3 team sa Group D makigsangka sa No. 2 sa Group C aron mag-ilog og luna sa quarter-finals.
Sa ilang bahin, ang Tall Blacks makigsangka sab karong Sabado sa pareho nilang wala’y pilde sulod sa duha ka mga duwa nga Chinese Taipei aron ilugan ang No. 1 sa Group D.
Sa lagda sa torneyo, ang mahimong No. 1 teams sa upat ka mga grupo mao ang deretsong makaabante sa quarter-finals samtang ang No. 2 ug No. 3 teams makigkontra pa’g team sa laing grupo sa inilugay og puwesto sa Top 8.
Puntos matag usa:
New Zealand 94 – Ngatai 22, Britt 19, Cameron 12, King 11, Darling 8, Smith-Milner 8, Gold 6, Davison 5, Andrew 3.
Gilas Pilipinas (86) – Brownlee 37, Ramos 19, Fajardo 11, Newsome 8, Quiambao 5, Tamayo 4, Thompson 2. Quarters: 23-18; 55-41; 74-68; 94-86. / ESL