Nahimong bayani si Justin Brownlee alang sa Gilas Pilipinas human siya nakapugos og overtime pinaagi sa three-pointer nga naghatag og agianan sa Gilas aron lupigon ang host Saudi Arabia, 95-88, sa usa ka knockout game niadtong Martes sa kadlawon, Agusto 12, 2025 (PH time), sa Fiba Asia Cup sa Jeddah, Saudi Arabia.
Ning kulbahinam nga kadaugan, nakaabante ang Gilas sa quarter-finals diin ilang ikaharong ang two-time defending champion Australia Boomers.
Si Brownlee, kinsa usa ka naturalized player sa Gilas ug resident import sa Brgy. Ginebra Gin Kings sa Philippine Basketball Association (NBA), nagpabuto og three-point bomb sa nahabiling 3.7 segundos sa regulation period nga maoy nagtabla sa duwa, 79-79, ug nakapugos og overtime.
Human niini, ang lanog nga abiba sa Saudi home crowd napulihan og singgit nga “Brownlee!, Brownlee!” gikan sa mabagang hut-ong sa Overseas Filipino Workers (OFWs) nga personal nga ningsaksi sa kulbahinam nga kombati.
"What a special game that was. A special performance for both teams. It was epic. It really was," matod ni Gilas coach Tim Cone nga napatik sa www.pba.ph.
Nag-ung-ong na unta sa pultahan sa kapildihan ang Gilas dihang nakaposte ang Saudi og 77-71 nga labaw sa nahabiling 1:24 sa regulation period.
Nagkumboya sila si Brownlee ug EJ Edu aron pabangunon ang Gilas ning maong biya hangtod nga napasulod ni Brownlee ang mabayanihong tres nga nakapugos og overtime.
Sa overtime, gipagawas ni Brownlee ang “never say die” nga kinaiya, nga iyang nahangop sa iyang dugay nga pagduwa sa Ginebra, ug mas nagmadasigon kini nga nitiwas sa iyang misyon.
Nakadawat og dakong tabang si Brownlee gikan nila ni Kevin Quiambao ug Dwight Ramos sa overtime ug nakontrolar sa Gilas ang duwa hangtod na sa katapusang gutlo. "We lost focus in the first few minutes of the overtime. And that was it," asoy ni Saudi Arabia star player Muhammad-Ali Abdur Rahkman.
Puntos matag usa:
Philippines (95) - Brownlee 29, Quiambao 17, Edu 17, Ramos 13, Fajardo 6, Tamayo 5, Thompson 4, Newsome 4.
Saudi Arabia (88) - Abdur Rahkman 33, Alsuwailem 26, Almuwallad 10, Abdel Gabar 8, Almarwani 4, Kadi 3, Belal 3, Mohammed Almarwani 1. Quarterscores: 25-15; 40-37; 60-59; 79-79; 95-88. / ESL