Ang headline inflation sa nasod mius-os og samot ngadto sa 1.4 percent sa Abril 2025, ang pinakaubos nga natala sukad sa Nobiyembre 2019.
Sa usa ka pamahayag, ang Philippine Statistics Authority (PSA) nagkanayon nga 39.5 percent sa inflation sa Abril natampo sa commodity group sa pabalay, tubig, kuryente ug gasolina; 24.6 percent sa pagkaon ug dili makahubog nga ilimnon ug 15.2 percent ang gikan sa mga restaurant ug accommodation service sama sa hotel, resort ug uban pa.
Ang PSA nakamatikod nga ang pagtibugsok sa kinatibuk-ang inflation dala sa hinay nga tinuig nga pagsaka sa index sa pagkaon ug non-alcoholic beverages sa 0.9 percent gikan sa 2.2 percent sa miaging bulan ug sa transport index sa 2.1 percent.
Ang pagsaka sa presyo sa pagkaon nihinay sab ngadto sa 0.7 percent gikan sa 2.3 percent niadtong Marso 2025 tungod sa mas paspas nga tinuig nga pagkunhod sa rice index sa 10.9 percent gikan sa 7.7 percent ingon man mga utanon, root crops, saging ug mga beans sa 2.3 percent; ug isda ug uban pang matang sa seafood sa 4.3 percent gikan sa 5.5 percent sa miaging bulan.
Ang nag-unang tulo ka grupo sa pagkaon nga nakatampo sa pagmahal sa pagkaon mao ang karne sa baboy og uban’g hayop, seafood, gatas, dairy products ug itlog.
Hinuon, ang inflation nikusog sa National Capital Region (NCR) ngadto sa 2.4 percent gikan sa 2.1 percent sa miaging buwan.
Ang nag-unang hinungdan sa pagsaka sa inflation rate sa lugar mao ang higher increment index sa pabalay, tubig, kuryente, gasolina sa 5.1 percent sa bulan sa Abril gikan sa 2.2 percent sa Marso 2025. /TPM / SunStar Philippines