Nangayo na usab ang gobyerno sa Pilipinas og red notice gikan sa International Criminal Police Organization (Interpol) para sa pagdakop sa gi-expel nga congressman sa Negros Oriental nga si Arnolfo Teves Jr.
Sa usa ka media forum, giingon ni Justice Undersecretary Raul Vasquez nga ang red notice magpahibalo sa Timor-Leste bahin sa arrest warrant nga giisyo sa Pilipinas batok kang Teves, nga kasamtangan nga nag-atubang og extradition sa maong nasod.
Matod ni Vasquez, dili pa mahimo nga i-deport si Teves pabalik sa Pilipinas tungod kay ang iyang kaso kay pending pa sa Timor-Leste.
“Si Congressman Arnie Teves, pending pa iyong kaso niya, bakit? Kasi nasa judicial processes,” matod niya.
Giingon ni Vasquez nga ang kaluwasan ug kasarinlan sa matag membro nga estado; neutrality; kooperasyon; ug pagrespeto sa mga katungod sa tawo mao ang nagagiya sa desisyon sa Interpol sa pagbalik sa usa ka pugante sa nasod nga nangayo og extradition.
Si Teves adunay standing arrest warrant tungod sa pagpatay kang kanhi Negros Oriental Governor Roel Degamo niadtong Marso 2023, nga misangpot usab sa kamatayon sa 10 ka inosenteng mga sibilyan.
Nag-abroad siya alang sa medikal nga pag-atiman sa dihang nahitabo ang pagpatay ug sukad niadto nagdumili siyang mobalik sa nasod tungod sa mga hulga batok sa iyang kinabuhi.
Una siyang nangayo og political asylum sa Timor-Leste apan kini gibalibaran.
Si Teves nadakpan niadtong Marso pinaagi sa usa ka Interpol red notice nga gi-request sa DOJ.
Atubang usab siya og murder charges nga may kalambigitan sa pagpatay sa tulo ka indibidwal sa probinsya niadtong 2019 lakip na si Miguel Dungog, usa ka kanhing board member sa Negros Oriental.
Giila siya isip usa ka terorista sa Anti-Terrorism Council samtang ang iyang pasaporte gi-cancel base sa mando sa DOJ. Usa ka korte sa Manila kaniadto nagpagawas og gag order, nga nagbabag sa tanan nga partido sa paghisgot sa merits sa kaso ni Degamo sa publiko. / TPM / SunStar Philippines