Nasugamak sa makapakugang nga kapildihan ang Philippine squad Strong Group Athletics (SGA) batok sa Al-Riyadi, 77-74, sa championship game sa 33rd Dubai International Basketball Championship ning Lunes sa buntag, Enero 29, 2024 (PH time).
Usa ka buzzer-beater three-point shot ni Ismail Abdelmoneim ang ningtiklo sa SGA.
Nagtabla ang duwa, 74-74, sa nahabiling 30 ka mga segundos unya naa sa SGA ang posisyon sa bola apan nasipyat si Andre Roberson sa iyang three-point attempt.
Human niini, ang napiling MVP nga si Wael Arakji nipasa sa bola ngadto sa nalibre nga si Abdelmoneim alang sa game-winner three-point shot.
Sa sayong bahin pa lang, nabiyaan na ang SGA, 12-3, nga nagrehistro sa labing ngil-ad nilang pagsugod sa kompetisyon.
Nagsalimoang sab ang SGA sa three-point area diin igo lang kining nitali og 1-of-11.
Unya ang leading scorer sa SGA nga si Kevin Quiambao, kinsa napili sa All-Tournament Team, wala’y nahimong puntos sulod sa 37 ka mga minutos nga pagduwa.
Puntos matag usa:
Al Riyadi (77) - Harries 23, Arakji 16, Abdelmoneim 10, Kikanovic 7, Zeinoun 6, Gyokchyan 5, Sakakini 5, Saoud 3, Mansour 2.
Strong Group (74) - Roberson 24, Howard 18, Heading 17, Moore 12, Blatche 3, Quiambao 0, Baltazar 0, Escandor 0, Cagulangan 0. Quarterscores: 22-12, 46-32, 61-57, 77-74. / ESL