Dul-an sa duha ka dekada gikan nga unang giplano ang katukoran Cebu Bus Rapid Transit (BRT) sa Sugbo gilauman nga sa dili madugay inisyal nang mapahimuslan ang maong proyekto.
Nipahibalo si Transportation Secretary Vince Dizon sa Miyerkules, Hulyo 23, 2025, nga adunay ipahigayon nga test runs sa Phase 1 alang sa P17-billion mass transportation project.
“After 13 long years of waiting, the People of Cebu and Cebu City will be experiencing first-hand the BRT system, at least the 1st phase of the Cebu BRT in one month time,” matod ni Dizon sa Hulyo 23.
Si Dizon nakigtagbo sa mga opisyales sa Sugbo nga ginangulohan ni Cebu Governor Pamela Baricuatro, Cebu City Mayor Nestor Archival ug Cebu City Vice Mayor Tomas Osmeña aron hisgutan ang proyekto.
Sa nasayran, usa ka buwan ang nilabay niluwat og pamahayag ang World Bank nga nagpasidaan sa hinay nga implementasyon sa proyekto.
Matod ni Dizon, ang pilot run maglangkob sa tulo ka bus stations sa unang phase nga motadlas gikan sa Cebu South Bus Terminal (CSBT) paingon sa Cebu Provincial Capitol.
Samtang gi-finalize ang disenyo, lakip ang bus station atubangan sa Kapitolyo, ang local ug national government officials nagkasinabot nga buksan na ang BRT.
“In the meantime, we can already run the system as suggested by Vice Mayor Tommy (Osmeña) kahit wala pa yung stations sa Capitol, pwede na nating patakbuhin ang three stations,” sigon ni Dizon.
Sa iyang bahin, si Baricuatro nakauyon sab sa gi-propose nga disenyo alang sa bus station nga ipahimutang sa atubangan sa Kapitolyo.
Ang mga bus ubos sa CiBus maoy gamiton alang sa pilot run sa Sugbo karong Septiyembre.
Ang CiBus nga nagsugod og dagan sa 2020, unang gi-disenyo nga maoy gamiton alang sa BRT project, ug aduna kini 20 ka mga operational units sa kasamtangan.
Apan ang Department of Transportation (DOTr) nagtinguha nga modugang pa og mga bus aron maka-accommodate sa uban pang mga pasahero.
Ang Cebu BRT unang gi-propose niadto pang 1990’s aron maalibyuhan ang reklamo sa huot nga sitwasyon sa trapiko sa Metro Cebu. / ANV