Ang tanang diplomatikong kawani sa Philippine Embassy sa Tehran magpabilin sa Iran aron padayon nga monitoron ug tabangan ang mga Pilipino.
Kini ang pamahayag sa Department of Foreign Affairs (DFA) sa Sabado, Hunyo 21, 2025.
Gibutyag ni Foreign Affairs Undersecretary Eduardo Jose De Vega ang maong kalambuan sa Sabado News Forum sa Quezon City, human sa una niyang pahayag nga aduna untay plano nga ilakip ang pipila ka non-essential personnel alang sa unang batch sa mga Pilipino nga ibakwit taliwala sa panagbangi sa Israel ug Iran.
Sa kasamtangan, adunay siyam ka diplomat sa embahada, lakip na si Philippine Ambassador Robert Manalo.
Gikutlo ni De Vega si Manalo nga nag-ingon nga ang Philippine mission dili mahimong mopull-out sa bisan usa lang ka personnel tungod kay silang tanan bililhon nga kawani aron magpadayon ang operasyon sa gamay nga embahada.
“They cannot even pull out even one. They will send home their wives, their dependents, (who) can always go home,” matod ni De Vega.
“Right now, they are staying in the embassy. Again this is what we signed up for,” dugang niya.
Nangita ang embahada og paagi aron mabakwit ang mga Pilipino gikan sa Iran, lakip na ang pagtabok sa yuta paingon sa kasikbit nga mga estado sama sa Turkmenistan.
Matod sa DFA, kadaghanan sa gibanabanang 1,200 ka mga Pinoy nga nagpuyo ug nagtrabaho sa Iran naminyo sa mga Iranian samtang kapin lang sa usa ka dosena ang mga trabahante.
Sa kinatibuk-an, matod ni DFA Assistant Secretary Robert Ferrer, siyam ang ni-request nga mopauli. / PNA